Crear unha skill a partir dunha conversa

Non sempre é necesario escribir a descrición da skill desde o principio. Tamén podes comezar pedíndolle a Claude que realice unha tarefa, revisar o resultado e ir afinando o comportamento con sucesivos prompts. Cando o resultado xa sexa satisfactorio, pídelle que converta todo o proceso nunha habilidade reutilizable.

Exemplo: crear exercicios prácticos de redes

Imos crear unha skill que cree preguntas tipo test a partir duns apuntamentos subidos a Claude.

A partir destes apuntamentos, créame 10 preguntas tipo test para que poida utilizalas cos meus alumnos.

Despois de revisar a resposta, podes pedir cambios concretos. Por exemplo:

Quero que cada pregunta teña 4 respostas posibles e que só unha delas sexa correcta.

E continúa afinando o resultado:

As preguntas son demasiado sinxelas. Fai que teñan un pouco máis de dificultade e que obriguen aos alumnos a pensar, non simplemente a lembrar o que aparece nos apuntamentos.

Evita que a resposta correcta sexa sempre a opción máis longa ou que se poida identificar facilmente. Quero que as catro opcións sexan razoables e parecidas entre si.

Cada prompt engade unha decisión ao fluxo de traballo. Revisa o exercicio e continúa ata que a estrutura, o nivel de dificultade e o tipo de explicacións sexan os axeitados.

Converter o proceso nunha habilidade

Cando esteas satisfeito co resultado, pídeslle a Claude que converta as instrucións acordadas nunha skill:

Agora que xa definimos como quero que se xeren estas preguntas, quero poder reutilizar estas instrucións cada vez que che proporcione novos apuntamentos. Converte todo o que fomos definindo nunha Skill, de maneira que un axente poida utilizala para xerar cuestionarios seguindo estas regras.

Claude xerará a habilidade a partir do traballo realizado na conversa. Revisa o ficheiro resultante e gárdao directamente desde a conversa ou descárgao para cargalo despois desde o xestor de Skills.

Resumo

O método iterativo permite descubrir as instrucións mentres se proba a tarefa. A conversa serve como borrador: cada prompt engade unha decisión e a skill final converte esas decisións nun procedemento reutilizable.