Nodos

Os nodos son os bloques fundamentais de n8n. Cada nodo representa unha acción concreta dentro dun fluxo de traballo: recibir datos, transformalos, envialos a outro servizo, etc. Un fluxo constrúese conectando nodos entre si.

Tipos de nodos

Trigger (disparador)

O trigger é sempre o primeiro nodo dun fluxo. É o que o pon en marcha cando se cumpre unha condición. Exemplos:

• Webhook: o fluxo arráncase cando se recibe unha petición HTTP.
• Schedule (programación): o fluxo execútase a unha hora ou intervalo determinado.
• Evento dunha aplicación: o fluxo arráncase cando ocorre algo nun servizo externo (un novo correo, unha mensaxe en Telegram, etc.).

Sen un trigger, o fluxo só se pode executar manualmente.

Acción

Os nodos de acción realizan operacións cos datos que reciben do nodo anterior. Exemplos:

• HTTP Request: fai unha chamada a unha API externa.
• Google Sheets: le ou escribe datos nunha folla de cálculo.
• Send Email: envía un correo electrónico.
• Telegram: envía unha mensaxe a un chat de Telegram.

Utilidades

Son nodos auxiliares para manipular os datos dentro do fluxo:

• If: bifurca o fluxo segundo unha condición.
• Merge: combina datos de varias ramas.
• Set: modifica ou crea campos nos datos.
• Code: executa código JavaScript ou Python personalizado.

Xestión de nodos

Engadir un nodo

1. Preme no botón + no lenzo ou ao final dun nodo existente.
2. Busca polo nome do servizo ou tipo de acción.
3. Selecciona o nodo e engadirase ao fluxo.

Configurar un nodo

Ao premer sobre un nodo, ábrese o panel de configuración onde podes:

• Seleccionar a operación que queres realizar (ler, crear, actualizar, etc.).
• Definir os parámetros necesarios (campos, filtros, valores).
• Engadir credenciais se o servizo require autenticación.

Conectar nodos

Arrastra a saída dun nodo (punto da dereita) á entrada do seguinte (punto da esquerda). Isto define a orde de execución e o paso de datos entre nodos.

Ao conectar dous nodos, n8n entrega automaticamente ao seguinte os elementos producidos polo anterior. Para empregar un campo concreto, activa Expression no campo de configuración e escribe unha expresión como:

{{ $json.mensaje }}

Esta expresión obtén o campo mensaje do elemento que está recibindo o nodo actual.

Se o dato está dentro dunha estrutura máis complexa, pódese seguir a ruta dos campos. Por exemplo, esta expresión obtén o HTML devolto por un nodo HTTP Request:

{{ $json.data }}

Seguir a ruta dun campo

Os datos que devolve un nodo están organizados como un obxecto. Para chegar a un campo que está dentro doutro, escríbense os nomes separados por puntos, desde o campo exterior ata o máis interior.

Por exemplo, imaxina que un nodo devolve estes datos:

{
  "content": {
    "parts": [
      {
        "text": "Texto xerado por Gemini"
      }
    ]
  }
}

Para obter o texto hai que seguir esta ruta:

$json -> content -> parts -> [0] -> text

A expresión completa sería:

{{ $json.content.parts[0].text }}

Cada parte da expresión significa o seguinte:

• $json: os datos do elemento actual.
• .content: entra no campo content.
• .parts: entra no campo parts, que neste caso é unha lista.
• [0]: selecciona o primeiro elemento da lista. As posicións comezan en cero.
• .text: obtén o campo text dese elemento.

Poe exemplo:

{{ $json.content.parts[0].text }}

Se a lista tivese varios elementos, poderías acceder ao segundo con [1], ao terceiro con [2], e así sucesivamente. Se o campo non existe ou a ruta non é correcta, a expresión non devolverá o valor esperado.

Tamén podes arrastrar un campo do panel de datos da saída do nodo anterior. n8n creará a expresión automaticamente, evitando ter que escribila manualmente.

Execución por elementos

Cada nodo execútase unha vez por cada elemento que recibe do nodo anterior. Se o nodo anterior envía cinco elementos, o seguinte executarase cinco veces, unha por cada elemento.

Eliminar un nodo

Selecciona o nodo e preme a tecla Supr ou fai clic dereito e selecciona Eliminar.

Probar un nodo

Podes executar un nodo individual premendo en Probar paso dentro do panel de configuración. Isto permite verificar que funciona correctamente antes de executar o fluxo completo.