Claude e MCP

Claude pode conectarse a servidores MCP de tres maneiras: mediante conectores incluídos, mediante servidores que se executan na nube ou mediante servidores que se executan no noso equipo.

Os conectores incluídos e os servidores na nube engádense directamente desde Claude Web, pero para empregar MCP que se executan localmente precísase Claude Desktop, a aplicación de escritorio de Anthropic.

Claude Desktop inicia estes servidores a partir do ficheiro de configuración claude_desktop_config.json. Así, Claude pode utilizar nas conversas as ferramentas que ofrece cada servidor local.

Tres formas de usar MCP con Claude

Claude permite traballar con servidores MCP de varias formas. A diferenza principal é o lugar onde se executa o servidor e como se engade a Claude.

Conectores incluídos

Claude xa ofrece algúns conectores listos para utilizar. Para activalos, abrimos o menú +, escollemos Conectores e prememos en Xestionar conectores. Neste caso non temos que configurar nin executar o servidor MCP manualmente.

Servidores MCP na nube

Tamén podemos engadir un servidor MCP remoto, que se executa na nube. Desde o menú +, escollemos Conectores, Engadir conector e Engadir conector personalizado. A configuración solicita os datos necesarios para conectarse ao servidor remoto.

Esta opción permite utilizar o servidor desde as aplicacións compatibles coa conta de Claude, sen ter que mantelo executándose no noso equipo.

Servidores MCP locais

Por último, podemos executar o servidor MCP no noso propio equipo. Esta opción utilízase con Claude Desktop, que inicia o servidor a partir do ficheiro claude_desktop_config.json.

Neste caso, o servidor pode executarse directamente coas ferramentas do sistema como npx ou dentro dun contedor Docker. A conexión queda asociada ao equipo onde está instalado Claude Desktop.