Exemplo 1: Sistema de ficheiros

Imos configurar un servidor MCP que permite manexar o sistema de arquivos do noso PC mediante linguaxe natural. Baseámonos no exemplo oficial dispoñible en modelcontextprotocol.io/examples.

Tipo de MCP

Este é un MCP local. Require Claude Desktop.

Configuración

Abre o ficheiro claude_desktop_config.json (lembra: Axustes → Desarrollador → Editar configuración) e engade o seguinte fragmento, adaptando a ruta ao teu caso:

{
  "mcpServers": {
    "filesystem": {
      "command": "npx",
      "args": ["-y", "@modelcontextprotocol/server-filesystem", "C:\\Users\\usuario\\Desktop"]
    }
  }
}

Que significa cada parte?

• filesystem: o nome que lle damos ao servidor MCP. Podes poñer calquera nome.
• npx: o comando que descarga e executa o paquete de Node.js.
• -y: acepta automaticamente todas as confirmacións durante a instalación.
• @modelcontextprotocol/server-filesystem: o paquete que se descarga e executa como servidor MCP.
• C:\\Users\\usuario\\Desktop: a ruta á que lle damos acceso. Podes engadir varias rutas como argumentos separados. Neste caso dámoslle permiso só para o escritorio.

Dobres barras invertidas

En JSON, a barra invertida \ é un carácter especial que hai que escapar escribindo \\. Por iso as rutas de Windows aparecen con dobres barras: C:\\Users\\...

Activar o servidor

Despois de gardar o ficheiro de configuración, reinicia completamente Claude Desktop. Ao volver abrilo, preme o botón + xunto ao cadro de chat. En Conectores deberías ver un co nome filesystem.

Ademais, a última versión de Claude Desktop permite engadir servidores MCP directamente dende a interface, sen editar o JSON manualmente: vai a Xestionar conectores → Engadir conector.

Permisos

Antes de comezar a usar o servidor, podes ir a Xestionar conectores e revisar os permisos que ten o MCP filesystem. Se non o fas, Claude irache pedindo confirmación cada vez que necesite realizar unha operación sobre os ficheiros.

Probas

Unha vez activado, podes probar o servidor facendo preguntas como:

• "Que arquivos teño no escritorio?"
• "Mete todas as imaxes do escritorio nunha nova carpeta chamada imaxes"
• "Propónme unha forma de organizar os ficheiros do meu escritorio"
• "Créame un ficheiro markdown explicando o que se pode facer co MCP de filesystem"

Sen permisos?

Se Claude che indica que non ten permisos para realizar unha operación, dáslle confirmación cando o pida ou reinicia a aplicación e inténtao de novo.